ფასარგადის მსოფლიო მემკვიდრეობა, წარმოადგენს აქემენიდური პერიოდის ძეგლების კომპლექს, რომელიც ფარსის ოსთანში, პერსეპოლისიდან ჩრდილო–აღმოსავლეთით 87 და შირაზიდან 130 კმ.-ში მდებარეობს. კომპლექსი მოიცავს შემდეგ ნაგებობებს: კიროს დიდის საფლავი, ფასარგადი, ფასარგადის სამეფო ბაღი, კარიბჭის სასახლე, ხიდი, საცერემონიო სასახლე, მეფის რეზიდენცია, ორი პავილიონი, სამეფო ბაღის შადრევნები, კამბისეს საფლავი, თოლ-ე თახთის ციტადელი, ქარვასლა, სარიტუალო ნაგებობა და ბოლაყის ხეობა. 2004 წელს, ფასარგადი მსოფლიო მემკვიდრეობის ნუსხაში წარსადგენი ობიექტის კრიტერიუმების პირველი, მე-2, მე-3 და მე-4 პუნქტების თანახმად (უნდა წარმოადგენდეს ადამინიას შემოქმედებითი გენიის ნიმუშს; უნდა მიუთითებდეს დროის გარკვეულ მონაკვეთში, ან მსოფლიო რომელიმე კულტურული არეალის ფარგლებში არქიტექტურის, მონუმენტური ხელოვნების, ქალაქგეგმარების ან ლანდშაფტური არქიტექტურის განვითარების სფეროში ადამიანურ ფასეულობათა მნიშვნელოვან ურთიერთგაცვლაზე; უნდა წარმოადგენდეს რომელიმე კულტურული ტრადიციის ან, დღესაც არსებული ან გამქრალი ცივილიზაციის ამსახველ უნიკალურ ან განსაკუთრებულ ნიმუშს; უნდა წარმოადგენდეს ნაგებობის, არქიტექტურული ანსამბლის ან ლანდშაფტის ღირსშესანიშნავ მაგალითს, რომელიც ასახავს კაცობრიობის ისტორიის მნიშვნელოვან ეტაპს(ებს).) შეტანილი იქნა იუნესკოს მსოფლიო მემკვიდრეობის ნუსხაში.
